FLASH
Shkruar nga Pamfleti
Kombëtarja shqiptare e futbollit u mposht me rezultatin 0-1 nga Izraeli në ndeshjen miqësore të zhvilluar në stadiumin “Air Albania”, duke i dhënë një nisje jo të mirë aventurës së trajnerit Rolando Maran në stolin kuqezi.
Takimi u vendos në minutën e 73-të, kur Oskar Gluk përfitoi nga një kundërsulm i shpejtë i miqve dhe nga hapësirat e krijuara në mbrojtjen shqiptare. Mesfushori izraelit finalizoi me një goditje diagonale, duke mposhtur portierin Alen Sherri dhe duke kaluar ekipin e tij në avantazh.
Pas golit, Gluk festoi përpara tifozëve shqiptarë, një veprim që u interpretua si provokim. Reagimi ishte i menjëhershëm nga mbrojtësi Elseid Hysaj, i cili u përplas verbalisht me autorin e golit. Gjyqtari ndërhyri duke ndëshkuar me karton të verdhë të dy futbollistët.
Izraeli pati mundësi të dyfishonte rezultatin në minutën e 82-të, por Alen Sherri u tregua vendimtar me një pritje shpëtimtare, duke mbajtur Shqipërinë në lojë deri në fund të takimit.
Pavarësisht episodit të tensionuar gjatë ndeshjes, atmosfera u qetësua pas vërshëllimës përfundimtare. Futbollistët e të dyja skuadrave u përshëndetën në mënyrë miqësore dhe nuk munguan bisedat mes tyre në fushë. Mes momenteve të vërejtura ishte edhe komunikimi mes kapitenit të Shqipërisë, Berat Gjimshiti, dhe futbollistit izraelit Manor Solomon.
Rezultati mbeti i pandryshuar deri në fund, me Izraelin që siguroi fitoren minimale 1-0 në Tiranë.
Lini një Përgjigje