FLASH
Shkruar nga Pamfleti
Breezy Johnson, e cila pak ditë më parë fitoi medaljen e artë në zbritjen e lirë për femra në Ski Alpin në Lojërat Olimpike, synoi të përsëriste suksesin edhe në garën e SuperG, të zhvilluar këtë të enjte.
Megjithatë, në aspektin sportiv, gara nuk shkoi sipas planit për amerikanen. Johnson u rrëzua gjatë zbritjes dhe nuk arriti ta përfundonte garën, duke i dhënë fund shpresave për një tjetër medalje.
Pavarësisht zhgënjimit në pistë, dita mori një kthesë të papritur dhe emocionale për sportisten. Në përfundim të garës, partneri i saj i doli përpara dhe, i ulur në gjunjë, i propozoi për martesë. Sipas pamjeve të publikuara në rrjetet sociale, Johnson pranoi propozimin.
Në një prej fotove të shpërndara, shihet dora e saj me unazën e fejesës dhe një etiketë ku shkruhej: “Kush jemi ne që të luftojmë me alkiminë?”, një frazë që duket se simbolizon lidhjen dhe ndjenjat mes çiftit.
Kështu, edhe pse nuk arriti të mbyllë me sukses garën e SuperG, për Breezy Johnson kjo e enjte do të mbetet një ditë e veçantë, e shënuar nga një moment i rëndësishëm në jetën personale.
Lini një Përgjigje