FLASH
Shkruar nga Pamfleti
Bodrumspor triumfoi 2-3 në transfertë ndaj Igdir FK në ndeshjen e raundit të 30-të të Ligës së Parë turke. Golin e parë për skuadrën mike e realizoi Taulant Seferi, duke i hapur rrugën suksesit të ekipit të tij.
Sulmuesi 29-vjeçar nga Kumanova u tregua i saktë nga pika e penalltisë në minutën e 18-të. Ky ishte goli i tij i 15-të në 29 paraqitje këtë sezon në kampionat me fanellën e Bodrumspor.
Forma e mirë e Seferit ka rikthyer edhe diskutimet për një rikthim të mundshëm të tij në Kombëtaren shqiptare gjatë këtij muaji. Ndeshja e fundit e sulmuesit me fanellën kuqezi daton më 19 nëntor 2024, në humbjen 1-2 ndaj Ukrainës në Ligën e Kombeve.
Prej rreth një viti e gjysmë ai nuk ka qenë pjesë e planeve të trajnerit Sylvinho, por paraqitjet e fundit kanë rritur ndjeshëm kuotat e tij. Trajneri i Kombëtares pritet të publikojë javën e ardhshme listën për ndeshjen play-off të Kupës së Botës 2026 ndaj Polonisë, ndërsa dëmtimet në repartin ofensiv – si ato të Brojës, Dakut dhe Manajt mund të hapin rrugë për përfshirjen e Seferit në skuadër.
Lini një Përgjigje