FLASH
Shkruar nga Pamfleti
Presidenti amerikan Donald Trump deklaroi se Irani "po vdes për t'u qetësuar", ndërsa dha detaje mbi ecurinë e bisedimeve indirekte mes Uashingtonit dhe Teheranit, të zhvilluara në Doha të Katarit.
Gjatë një fjalimi, Trump u shpreh se administrata amerikane kishte pezulluar përkohësisht negociatat për shkak të ceremonive mortore në Iran.
"Irani po vdes për t'u qetësuar. Ne u dhamë atyre një javë pushim për një funeral, sepse jemi të sjellshëm", deklaroi Trump.
Më herët gjatë javës, përfaqësues të SHBA-së dhe Iranit zhvilluan bisedime indirekte në Doha për konfliktin në rajon. Negociatat u ndërprenë përpara ceremonive mortore të ish-udhëheqësit suprem iranian, Ajatollah Ali Khamenei.
Ndërsa zëdhënësi i Ministrisë së Jashtme të Katarit, Majed al-Ansari, tha se takimet kanë prodhuar sinjale inkurajuese.
"Takimet indirekte mes negociatorëve amerikanë dhe iranianë kanë shënuar përparim pozitiv", deklaroi al-Ansari.
Ai shtoi se raundi i ardhshëm i negociatave do të zhvillohet "sa më shpejt të jetë e mundur" pas përfundimit të ceremonive mortore në Iran.
Edhe zëvendëspresidenti amerikan, JD Vance u shpreh optimist për procesin, por theksoi se është ende herët për përfundime. "Bisedimet po shkojnë mirë, megjithëse është ende shumë herët", u shpreh Vance.
Ndërkohë, zhvillimet diplomatike në Lindjen e Mesme vazhdojnë edhe në fronte të tjera. Javën e kaluar, Libani dhe Izraeli nënshkruan një marrëveshje të ndërmjetësuar nga Shtetet e Bashkuara, por përplasjet nuk janë ndalur. Vetëm dy ditë pas marrëveshjes, Izraeli miratoi vazhdimin e operacioneve ushtarake në jug të Libanit.
Po ashtu, ministri i Jashtëm i Sirisë zhvilloi këtë javë vizitën e tij të parë zyrtare në Bejrut, ku u takua me drejtuesit libanezë, në një moment kur administrata Trump ka përmendur mundësinë e një angazhimi më të madh sirian në Liban.
Lini një Përgjigje