FLASH
Shkruar nga Pamfleti
Sekretari i Përgjithshëm i NATO-s, Jens Stoltenberg tha se situata për Ukrainën është kritike dhe mund të përkeqësohet më tej për shkak të mungesës së ndihmës nga Perëndimi.
“Duhet të përgatitemi për lajme të këqija. Konfliktet zhvillohen në faza. Por ne duhet ta mbështesim Ukrainën edhe në kohë të këqija edhe në të mira”, tha Stoltenberg për kanalin gjerman “Erste”, duke iu përgjigjur pyetjes së një gazetari nëse ka frikë se situata në Ukrainë do të përkeqësohet në të ardhmen.
Ai pranoi se anëtarët e Aleancës nuk janë në gjendje të plotësojnë kërkesën në rritje të Ukrainës për municion. Duke iu referuar situatës, Stoltenberg deklaroi se nuk ka pasur përparim të dukshëm në muajt e fundit, por nuk dëshiron të komentojë zhvillimet e mëtejshme.
“Luftërat janë në thelb të paparashikueshme. Por ne e dimë se sa më shumë ta mbështesim Ukrainën, aq më shpejt do të përfundojë lufta”, u shpreh Stoltenberg.
Sekretari i Përgjithshëm i NATO-s dënoi më parë Evropën, duke vënë në dukje se vendet evropiane ndjekin interesat e tyre dhe nuk mund të rrisin prodhimin e armëve për Ukrainën.
“Nuk jemi në gjendje të bashkëpunojmë aq ngushtë sa duhet. Kjo çon në kosto më të larta dhe e bën të vështirë rritjen e prodhimit”, tha ai.
Lini një Përgjigje