FLASH
Shkruar nga Pamfleti
Të paktën 18 persona kanë humbur jetën dhe dhjetëra të tjerë janë plagosur pas një sulmi të gjerë me raketa dhe dronë që Rusia ndërmori gjatë natës ndaj kryeqytetit ukrainas, Kievit, sipas autoriteteve lokale.
Në orët e para të mëngjesit të së enjtes, zjarrfikësit po luftonin me flakët në disa pjesë të qytetit, ndërsa raketat ose mbetjet e tyre goditën ndërtesa banimi në disa lagje, si edhe një hotel në një nga bulevardet qendrore të Kievit.
Shërbimet e emergjencës bënë të ditur se 86 persona janë plagosur, prej të cilëve 70 janë dërguar në spital. Autoritetet paralajmërojnë se numri i viktimave mund të rritet, pasi ekipet e kërkim-shpëtimit vazhdojnë punën nën rrënoja.
Shpërthime të fuqishme u dëgjuan për disa orë me radhë, ndërsa valë të njëpasnjëshme dronësh, raketash lundruese dhe raketash balistike u drejtuan drejt kryeqytetit. Sistemet ukrainase të mbrojtjes ajrore u përpoqën t'i neutralizonin gjatë fluturimit.
Kryebashkiaku i Kievit, Vitali Klitschko, njoftoi në Telegram se në një prej zonave të goditura, gjashtë katet e para të një pallati u shembën pas një goditjeje të drejtpërdrejtë. Në një tjetër lagje, ekipet e shpëtimit nxorën banorë nga rrënojat pasi një pjesë e një ndërtese shumëkatëshe u shemb.
Rusia ka kryer vazhdimisht sulme të kombinuara me raketa dhe dronë ndaj Kievit, ndërsa prej disa ditësh kishte paralajmërime se po përgatitej një ofensivë tjetër në shkallë të gjerë.
Presidenti ukrainas Volodymyr Zelenskyy u kishte bërë thirrje qytetarëve të mërkurën që të tregoheshin veçanërisht të kujdesshëm.
"Ju kërkoj të gjithëve të jeni shumë të kujdesshëm, të kujdeseni për veten dhe fëmijët tuaj dhe të përdorni strehimoret. Kjo është shumë e rëndësishme," deklaroi Zelenskyy gjatë një vizite në Dublin.
Mijëra banorë kaluan natën në stacionet e metrosë, të cilat përdoren si strehimore kundërajrore. Sulmet e fundit kanë rikthyer shqetësimin mes qytetarëve, edhe pas më shumë se katër vitesh luftë në shkallë të plotë.
Në fund të muajit maj, Rusia u kishte bërë thirrje diplomatëve të huaj të largoheshin nga Kievi, duke paralajmëruar se do të shtonte sulmet ndaj asaj që e cilëson si "qendra vendimmarrëse".
Ndërkohë, Rusia po përballet me mungesa karburanti si pasojë e sulmeve me dronë me rreze të gjatë të Ukrainës ndaj rafinerive të naftës. Disa rajone ruse kanë vendosur kufizime në furnizimin me benzinë, ndërsa autoritetet ruse në Krimenë e pushtuar kanë shpallur gjendje të jashtëzakonshme.
Zyrtarët ukrainas kanë deklaruar se do të vazhdojnë presionin ushtarak ndaj Krimesë, të aneksuar nga Rusia në vitin 2014 dhe që shërben si një qendër kryesore logjistike për operacionet ushtarake ruse në juglindje të Ukrainës.
Po të enjten në mëngjes, guvernatori i rajonit rus të Nizhny Novgorodit njoftoi se një person humbi jetën pas një sulmi me dron ndaj objekteve industriale.
Ministria ruse e Mbrojtjes deklaroi se në sulmet ndaj Ukrainës u përdorën armë të lëshuara nga ajri, toka dhe deti, duke pretenduar se operacioni ishte një kundërpërgjigje ndaj sulmeve ukrainase. Moska tha se objektivat ishin instalime ushtarake dhe infrastruktura energjetike, ndërsa goditje u raportuan edhe në rajone të tjera përveç Kievit.
Nga ana tjetër, ministri i Jashtëm i Ukrainës, Andrii Sybiha, i cili ndodhet për vizitë zyrtare në Japoni, e cilësoi "të pamoralshëm" pretendimin se sulmet ruse janë hakmarrje për operacionet ukrainase.
"Në këtë luftë ekziston një agresor dhe një shtet që po mbrohet. Rusia nuk ka të drejtë të kryejë sulme ndaj Ukrainës, ndërsa Ukraina ka të drejtën të mbrohet dhe të godasë objektiva legjitime ushtarake në territorin rus. Nuk mund të barazohen agresori dhe vendi që po mbrohet nga agresioni," shkroi Sybiha në platformën X.
Ai përsëriti kërkesën urgjente të Kievit drejtuar aleatëve për furnizimin me më shumë sisteme të mbrojtjes ajrore, duke e përshkruar natën e kaluar si "një natë tmerri" për kryeqytetin ukrainas.
Kryebashkiaku Vitali Klitschko shpalli të premten ditë zie në Kiev. Sipas tij, dëme janë regjistruar pothuajse në të gjithë qytetin me rreth tre milionë banorë, ndërsa shumë ndërtesa kanë pësuar shkatërrime të konsiderueshme.
Si masë parandaluese, Polonia, anëtare e NATO-s dhe Bashkimit Evropian, ngriti në fluturim avionë luftarakë për të monitoruar situatën pranë kufirit. Ndërkohë, Finlanda vendosi përkohësisht kufizime në hapësirën ajrore mbi Gjirin Lindor të Finlandës.
Lini një Përgjigje