FLASH
Shkruar nga PamfletiAutoritetet kroate njoftuan Bashkimin Evropian për një ngarkesë të Prince Caffe të prodhuar nga Devolli Group, pasi testet laboratorike zbuluan nivele të akrilamidit mbi limitin e lejuar. Sistemi RASFF i Komisionit Evropian e regjistroi rastin si një rrezik serioz për shëndetin publik...
Një dërgesë me kafe Prince Caffe, një produkt i grupit Devolli me origjinë nga Kosova, u ndalua në kufirin kroat dhe u shkatërrua pasi testet laboratorike zbuluan nivele të larta të akrilamidit, një substancë e lidhur drejtpërdrejt me rrezikun kancerogjen, duke i detyruar autoritetet kroate të aktivizojnë mekanizmin e alarmit të Bashkimit Evropian dhe ta regjistrojnë rastin në sistemin zyrtar RASFF si një rrezik serioz për shëndetin publik.
Analizat e kryera më 11 dhjetor 2025 treguan 746.3 mikrogramë akrilamid për kilogram kafe, pothuajse dyfishi i limitit maksimal të lejuar nga legjislacioni evropian, i cili përcakton pragun në 400 mikrogramë për kilogram, gjë që për BE-në nuk përbën thjesht një shkelje teknike, por një sinjal të dështimit të kontrollit industrial në procesin e pjekjes dhe prodhimit.
Autoritetet nuk e lejuan produktin të hynte në treg, e mbajtën atë nën vulën doganore dhe urdhëruan shkatërrimin e tij, duke e trajtuar atë si një mall të rrezikshëm për konsumatorët, ndërsa njoftimi i Komisionit Evropian mbetet publik dhe i arritshëm si një dokument zyrtar i një rasti që përfshin një nga markat më të njohura të kafesë në rajon.
Prince Caffe është ndërtuar prej vitesh si një simbol i cilësisë, eksportit dhe suksesit industrial, por ky episod nxjerr në pah një kontrast të fortë midis imazhit komercial dhe realitetit të verifikuar në laboratorët e BE-së, sepse akrilamidi nuk është ndotje aksidentale apo një gabim paketimi, por një produkt i drejtpërdrejtë i procesit të pjekjes në temperaturë të lartë, një proces që kontrollohet plotësisht nga prodhuesi.
Këtu fillon pyetja që shtrihet përtej kufirit kroat dhe arrin drejtpërdrejt në Shqipëri, pasi Prince Caffe Tirana furnizohet nga i njëjti burim prodhimi në Kosovë dhe shpërndan kafe në dhjetëra bare, restorante dhe pika shitjeje me pakicë, pa asnjë transparencë publike mbi seritë e prodhimit, analizat laboratorike apo mekanizmat e vetëkontrollit për një substancë që BE-ja e konsideron me rrezik të lartë.
Devolli Group nuk ka sqaruar nëse dërgesa e ndaluar në Kroaci i përket një grupi të izoluar apo një cikli më të gjerë prodhimi, nuk ka njoftuar tërheqje produktesh nga tregjet ku Prince Caffe shitet lirisht dhe nuk ka publikuar rezultatet e analizave të brendshme për akrilamidin, duke zgjedhur heshtjen në një kohë kur transparenca është një detyrim, jo një zgjedhje.
Në këtë kontekst, shqetësimi nuk lidhet më vetëm me një refuzim kufitar, por me një problem të mundshëm që shtrihet në treg, sepse nëse BE-ja ndalon dhe shkatërron një produkt për rreziqe shëndetësore, lindin natyrshëm dyshime se çfarë ndodhi me të njëjtin produkt që kaloi pa pengesa në Shqipëri dhe përfundoi në gotat e konsumatorëve.
Institucionet e sigurisë ushqimore në Shqipëri deri më tani nuk kanë reaguar publikisht, nuk kanë njoftuar kontrolle shtesë dhe nuk kanë sqaruar nëse i kanë verifikuar seritë e Prince Caffe që qarkullojnë në Tiranë, ndërsa rasti i regjistruar në Bruksel është një fakt zyrtar dhe i dokumentuar.
Në fund të fundit, kontrasti mbetet i theksuar dhe i pakëndshëm, sepse një produkt që në BE konsiderohet një rrezik serioz për shëndetin publik, në Shqipëri vazhdon të shitet normalisht, pa paralajmërim dhe pa llogaridhënie, duke e shndërruar çështjen e Prince Caffe nga një problem teknik në një provë konkrete se si funksionon ose dështon mbrojtja e konsumatorit në rajon. /Pamflet
Mos! Sa lajm i keq! Jo për popullin, se ky popull është mësuar tashmë me perime e fruta me hormone e pesticide (si psh manderinat etj) dhe hesht. Por, dikush t'i thojë Arbana Osmanit që të heqë dorë nga publiciteti për Prince Caffe se do i prishet imazhi (nëse vërtet kjo kafe ka lëndë të dëmshme për shëndetin).
Po mirë ju qe shkruani dhe vlerësohet kjo, por përse nuk shkruajnë mediat në Kosovë. Apo janë të shitura. Apo tjetra, a ka prokurorë të cilët e duan dhe janë betuar për të ruajtur popullin nga kriminelet dhe monopolistët kanceroz. Si duket duhet të shkruani edhe për gazetarët dhe prokurorët e Kosovës që kan shitur shpirtin djallit. Familja Devolli po shkatërron kosovaret
Pamfleti, a mund te gjurmoni se kush e sjell miellin sërb në Shqipëri? A është ky miellin brenda normave shqiptare e europiane? Faleminderit!
Mielli eshte qe vjen ne Shqiperi me te gjithe treguesit sipas analizave.. Kjo do me thene qe produkti eshte i rregullt. Leji budallalliqet qe pllasin ne TV. Te gjithe hane tw paguar nga importuesit vendas. Te kujtohet sa ishte cmimi i miellit para se hynte nga kosova? Ta them une, jo me pak se 1000-1100 leke/kg .. Tani pyet veten perse propaganda ne tv kunder miellit qe hyn nga Kosova e Serbia.. Si puna e atyre qe denigrojne makaronat italiane dhe prodhojne ne Shqiperi cilesine me te qelbur