FLASH
Shkruar nga Pamfleti
Një skandal i pazakontë ka shpërthyer në futbollin senegalez, pasi Federata Senegaleze e Futbollit (FSF) zbuloi se mjeku i ekipit kombëtar, i cili kishte shërbyer për rreth një dekadë, nuk kishte profilin e duhur për të mbuluar nevojat e një skuadre elitare.
Presidenti i FSF-së, Abdoulaye Fall, deklaroi se Dr. Abderahmane Fedior është me profesion gjinekolog dhe obstetër, duke pranuar se ky fakt u konstatua vetëm pas eliminimit të Senegalit nga Kupa e Botës 2026.
“Mjeku i ekipit tonë nuk ka përgatitjen akademike për të mbështetur atletët tanë. Kjo është diçka që e zbulova mjaft vonë, sepse Dr. Fedior është gjinekolog me profesion”, tha Fall.
Kreu i federatës mori përgjegjësinë për situatën, duke theksuar se mjeku nuk kishte kualifikimet e nevojshme për menaxhimin e sportistëve në nivel ndërkombëtar. Sipas tij, disa futbollistë kishin shfaqur edhe hezitime për t'u trajtuar prej tij, për shkak të mospërputhjes mes specializimit dhe kërkesave të futbollit profesionist.
Pas zbulimit, federata emëroi në stafin mjekësor specialistin e mjekësisë sportive, Dr. Jean-Marc Sene.
Megjithatë, Shoqata Senegaleze e Mjekësisë Sportive i hodhi poshtë deklaratat e presidentit të federatës, duke i cilësuar ato si “të pabaza dhe shpifëse”. Sipas organizatës, Dr. Fedior, përveç specializimit në gjinekologji, zotëron edhe një diplomë në mjekësinë sportive nga Universiteti “Cheikh Anta Diop”.
Ky episod vjen në një periudhë të trazuar për futbollin senegalez. Përveç eliminimit të hershëm nga Kupa e Botës 2026, federata është përballur edhe me probleme administrative, përfshirë vonesa në pagesat e bonuseve për lojtarët dhe mungesën e një kontrate të vlefshme për trajnerin Pape Thiaw, i cili u shkarkua së bashku me stafin e tij teknik pas dështimit në turne.
Lini një Përgjigje