FLASH
Shkruar nga Pamfleti
Dy futbollistët e kombëtares shqiptare U-16, Glen Macaj dhe Kristian Lila, kanë siguruar bursa akademike (scholarships) në akademinë e Uest Hemit, një prej klubeve të njohura angleze.
Klubi londinez ka publikuar listën e futbollistëve të rinj që do të vazhdojnë rrugëtimin në strukturat e tij, ku përfshihen edhe dy talentet shqiptarë. Përzgjedhja e tyre përbën një vlerësim të punës dhe potencialit që kanë shfaqur gjatë zhvillimit të tyre në futboll.
Macaj dhe Lila kanë qenë pjesë e përfaqësueses shqiptare U-16, ku me paraqitjet e tyre kanë tërhequr vëmendjen e akademisë së Uest Hemit.
Glen Macaj vlerësohet për inteligjencën taktike dhe aftësinë për të interpretuar role të ndryshme në mbrojtje dhe mesfushë, ndërsa Kristian Lila spikat për teknikën individuale, vizionin në ndërtimin e lojës dhe kontributin në organizimin e aksioneve të skuadrës.
Në futbollin anglez, një bursë akademike përfaqëson një etapë të rëndësishme në zhvillimin e një lojtari të ri, pasi u mundëson futbollistëve të vazhdojnë formimin e tyre në akademi dhe t'i afrohen nënshkrimit të kontratës së parë profesionale. Për Macajn dhe Lilën, ky është një hap i rëndësishëm drejt skuadrave U-18 dhe U-21 të Uest Hemit.
Akademia e Uest Hemit, e njohur si "The Academy of Football", konsiderohet ndër më prestigjiozet në Angli për zhvillimin e talenteve. Përfshirja e dy futbollistëve shqiptarë në këtë program përbën një tjetër sinjal pozitiv për perspektivën e futbollit shqiptar dhe zhvillimin e brezit të ri të lojtarëve në arenën ndërkombëtare.
Lini një Përgjigje