Forum21 Korrik 2023, 20:34

Tallja me qytetarët/ Këshillimi Kombëtar rikthehet si argument për kanabisin

Shkruar nga Pamfleti

Tallja me qytetarët/ Këshillimi Kombëtar rikthehet si argument

Këshillimi Kombëtar ishte një farsë dhe kjo kuptohej nga mënyra me të cilin u vu në zbatim. Në vend të organizonte një referendum për temat që hodhi në pyetësor, qeveria shpërndau zarfe me 12 pyetje në shtëpitë e qytetarëve.

Sa herë që kritikët i kujtojnë Edi Ramës interesin e popullin shqiptar, ai ka gati një shprehje; “Populli shqiptar është më i mençur se sa kujtoni ju”. Por nga tallja e trashë që ka bërë me përgjigjet e qytetarëve në Këshillimin Kombëtar, duket se as vetë nuk e beson atë që thotë.

Po të kthehemi në fillim të muajit Korrik, kryeministri bëri një deklaratë surprizë dhe shpalli fundin e Ballkanit të hapur. Papritur, e quajti atë një mision të përmbushur, të cilit i kishte ardhur fundi.

Pas kësaj, Lapsi.al iu kthye argumenteve me të cilin Edi Rama e mbrojti aventurën e tij me Vuçiçin përmes përgjigjes së 59% e shqiptarëve që kishin mbështetur në Këshillimin Kombëtar. Nga mbi 500 mijë të pyetur rezultonte se shumica ishin pro një rajoni me lëvizje të lirë të njerëzve mallrave dhe ideve.

Kuptohet se me kthesën e papritur për t’i dhënë fund Ballkanit të Hapur, Rama i hodhi në koshin e plehrave përgjigjet e Këshillimit Kombëtar. Zarfat e qindra mijëra qytetarëve nuk kishin më asnjë vlerë, ndryshe nga çfarë ishte propaganduar në fillim të vitit që shkoi.

Por tallja nuk ka përfunduar këtu. Kur i leverdisin përgjigjet e Këshillimit Kombëtar, ato rikthehen si argumente. Në prezantimin e projektligjit për legalizimin e kanabisit, Ministrja e Shëndetësisë, Ogerta Manastirliu e nisi fjalimin në parlament pikërisht me rezultatet e Këshillimit Kombëtar.

“Mbi 61% e qytetarëve të pyetur gjatë Këshillimit Kombëtar janë përgjigjur se Shqipëria duhet të lejojë kultivimin, përpunimin dhe eksportin e kontrolluar nga shteti të kanabisit për arsye mjekësore”, tha Manastirliu.

Sipas Ramës dhe Manastirliut, 300 mijë qytetarë që i kthyen përgjigje me zarf duhen dëgjuar kur janë pro legalizimit të kanabisit për përdorim mjekësor, por mund të shpërfillen kollaj kur janë pro Ballkanit të Hapur.

Kjo logjikë gjen shpjegim në arrogancën e mandatit të tretë të qeverisjes së Rilindjes.

Këshillimi Kombëtar ishte një farsë dhe kjo kuptohej nga mënyra me të cilin u vu në zbatim. Në vend të organizonte një referendum për temat që hodhi në pyetësor, qeveria shpërndau zarfe me 12 pyetje në shtëpitë e qytetarëve. Nuk pati asnjë transparencë për procedurat me të cilat u numëruan dhe si u nxorën rezultatet. Sigurisht që në fund, rezultatet ishin në favor të çështjeve që mbronte qeveria.

Por nga tallja në tallje, kuptohet edhe diçka tjetër; se ndryshe nga ajo që thotë në publik sikur mendon se populli është i mençur, Rama qeveris në realitet sikur po drejton një tufë delesh të humbura qw e ndjekin pas në çdo rast./Lapsi.al

kanabisi rama keshillimi kombetar