Politike25 Qershor 2024, 16:38

Kushtetuesja seancë për mandatin e Xhaçkës, Bardhi: Rama po tenton ta kthejë gjykatën në aneks të qeverisë

Shkruar nga Pamfleti

Kushtetuesja seancë për mandatin e Xhaçkës, Bardhi: Rama

Kreu i Grupit Parlamentar të Partisë Demokratike Gazment Bardhi, ka folur pas seancës së zhvilluar për mandatin e Olta Xhaçkës në Gjykatën Kushtetuese.

I pranishëm në seancës në emër të PD e cila ridepozitoi padinë në GJK, Gazmend Bardhi i kërkoi trupës gjykuese të ngrihet në lartësinë e detyrës.

Ai akuzoi kryeministrin Rama se po tenton ta kthejë Kushtetuesen në aneks të qeverisë, ndërsa deklaroi se Xhaçka ka përfituar 10 mijë e 500 metra tokë në bregdet me firmë të Edi Ramës.

“Secili prej nesh mund të ketë komente, por nuk mund të vejë në pikëpyetje për të zbatuar vendimin e Kushtetueses. Në këtë rast është lënë pa zbatim një vendim i GJK, por me qëndrimin që ka mbajtur mazhoranca i ka dhënë të drejtën vetes të komentojë dhe ka injoruar vendimin e Kushtetueses”, tha Bardhi.

Gjykata Kushtetuese zhvilloi sot seancën për mandatin e deputetes së Partisë Socialiste, pasi Kuvendi injoroi kërkesën e kësaj gjykate për ta dërguar çështjen  për shqyrtim në Kushtetuese.  

Padia për Xhaçkën u bë nga PD, ndërsa kreu i grupit parlamentar demokrat Gazmend Bardhi, i pranishëm në seancë,  deklaroi se mazhoranca nuk ju bind vendimit të GJK, duke shkelur çdo parim të shtetit të së drejtës. Pas dëgjimit të palëve, trupa gjykuese u tërhoq për vendim.

Në seancën e Kuvendit të 11 prillit, mazhoranca votoi kundër dërgimit të mandatit të deputetes socialiste Olta Xhaçka për shqyrtim në Gjykatë Kushtetuese, siç kjo e fundit ka urdhëruar në vendimin e janarit 2023.

Pas këtij vendimi, PD ridepozitoi në Kushtetuese kërkesën për mandatin e Xhaçkës, teksa pritet që kjo e fundit të dalë në një vendimmarrje.