Shkruar nga Pamfleti
Ish-ndihmësi i Presidentit Obama, profesori Charles Kupchan, në prag të takimit të së hënës Kurti-Vuçiç në Bruksel, ka komentuar procesin e dialogut, duke thënë se epilogu i tij heq ndikimin e Rusisë në Ballkan. Por shtoi se ky proces nuk do të ndodh brenda natës.
“Zgjidhja graduale e çështjeve të hapura ndërmjet Kosovës dhe Serbisë, si dhe marrëveshja përfundimtare, për mendimin tim, do të jetë një hap i rëndësishëm përpara në kufizimin dhe përfundimisht heqjen e bastionit dhe ndikimit të Rusisë në rajon. Por, të jemi realist – nuk do të ndodhë brenda natës, është një proces që do të zgjasë”, tha ai për "Zërin e Amerikës".
Kupchan, i cili një pjesë të karrierës së tij e kaloi si zyrtar i ngarkuar me çështjet evropiane në Këshillin e Sigurisë Kombëtare gjatë mandatit të Barack Obamës, thotë se ndërmjetësit e dialogut Kosovë-Serbi nuk po favorizojnë ndonjërën palë aktualisht.
“Nuk e kam ndjesinë se Bashkimi Europian dhe SHBA-ja po i japin ndonjë lloj supremacie njërës prej palëve për momentin. Jam i sigurt se ata dëshirojnë me vendosmëri që puna të përfundojë dhe të dalin nga periudha në të cilën marrëdhëniet ndërmjet Kosovës dhe Serbisë dhe destabiliteti në Bosnje e Hercegovinë e ktheu Ballkanin në qendër të vëmendjes”, tha ai.
Ai thotë se edhe pse dy fuqitë, SHBA e BE, janë të fokusuar te Ukraina, duan që të arrijnë qëllimin edhe në normalizimin e marrëdhënieve mes dy fqinjëve ballkanikë.
“Pavarësisht se SHBA dhe BE janë kryesisht të preokupuara me luftën në Ukrainë, aspirata e tyre e përbashkët është të bëjnë gjithçka që është e nevojshme që të dyja palët të arrijnë qëllimin – kur bëhet fjalë për normalizimin e marrëdhënieve të tyre”, përfundoi ai.
