Shkruar nga Pamfleti
Myrto Uzuni ishte protagonist absolut i fundjavës në Spanjë. Sulmuesi i kombëtares shqiptare ndihmoi skuadrën e Granadëd që të fitonte sfidën e fundit ndaj Leganeses me shifrat 2-1, teksa tundi vetë rrjetën, duke siguruar kthimin si kampionë të Kategorisë së Dytë Spanjolle në La Liga.
Një arritje e shkëlqyer për sulmuesin shqiptar, i cili u bë edhe golashënuesi më i mirë i këtij edicioni në La Liga 2 me 23 gola të shënuar. Padyshim kurorëzimi i një sezoni të jashtëzakonshëm për Uzunin, i cili është kthyer në një nga emrat më të ndjekur në futbollin spanjoll falë paraqitjeve të tij.
Ndaj nuk është aspak rastësi që edhe prestigjiozja sportive spanjolle “AS” e ka vendosur shpeshherë në formacionin ideal të javëve të kampionatit, siç ndodhi edhe në të fundit, ku ai u rendit mes më të mirëve.
“Nuk mund të mungonte. Golashënuesi më i mirë i Segunda, është faktori i vërtetë që bëri diferencën. 23 gola në këtë sezon që i kanë dhënë Granadës një mal me pikë. Ndaj Leganeses hapi serinë e golave me një gjuajtje diagonale”, shkruan “AS” në përshkrimin për futbollistin në shkrimin e saj për formacionin e javës së fundit të La Liga 2.
