FLASH
Shkruar nga Pamfleti
Elseid Hysaj ka shkruar një tjetër faqe të rëndësishme në historinë e futbollit shqiptar, duke u bërë një nga lojtarët e paktë që arrijnë shifrën e 100 ndeshjeve me ekipin kombëtar.
Përballja ndaj Luksemburgut shënon paraqitjen e 100-të të mbrojtësit kuqezi me fanelën e Shqipërisë. Hysaj debutoi me Kombëtaren në shkurt të vitit 2012, në një ndeshje miqësore kundër Gjeorgjisë, dhe që prej asaj kohe është shndërruar në një prej figurave më të rëndësishme dhe më të qëndrueshme të ekipit përfaqësues.
Gjatë 14 viteve me kuqezinjtë, ai ka qenë pjesë e disa prej momenteve më të rëndësishme të futbollit shqiptar, duke dhënë kontribut të vazhdueshëm në sukseset dhe paraqitjet e Kombëtares në arenën ndërkombëtare.
Me arritjen e kuotës së 100 ndeshjeve, Hysaj bashkohet me një grup futbollistësh të njohur në skenën botërore që kanë regjistruar po aq paraqitje me ekipet e tyre kombëtare. Mes tyre renditen emra të njohur si Karles Pyjol i Spanjës, Jaja Ture i Bregut të Fildishtë, Robinjo i Brazilit dhe Dario Simiç i Kroacisë.
Ky jubile përfaqëson një vlerësim të rëndësishëm për karrierën e mbrojtësit shqiptar, duke konfirmuar rolin e tij si një nga lojtarët më jetëgjatë dhe më të rëndësishëm në historinë e Kombëtares së Shqipërisë.
Lini një Përgjigje