FLASH
Shkruar nga Pamfleti
Matteo Salvini ka reaguar ndaj deklaratave të këngëtarit Ermal Meta, të bëra një ditë më parë gjatë një konference për shtyp.
Artisti me origjinë shqiptare, duke folur për tekstet e këngëve, deklaroi: “Nëse Akademia e Crusca-s zgjedh ndër më të mirët një tekst të shkruar nga një emigrant, bëni disa pyetje.” Ai shtoi me ironi: “Jam i huaj, mos ia tregoni Salvinit, se mos ndihet keq.”
Pas këtyre komenteve, Zëvendëskryeministri Salvini publikoi një deklaratë zyrtare ku përgëzoi Ermal Metën për “përdorimin e përsosur të gjuhës italiane”, duke e cilësuar atë “një shembull integrimi në vendin tonë”.
Ermal Meta, 44 vjeç, u largua nga Shqipëria në moshën 13-vjeçare dhe u vendos me familjen në Bari, ku u rrit dhe ndoqi studimet muzikore në një shkollë italiane. Ai ka përfunduar procedurat për marrjen e shtetësisë italiane dhe gëzon statusin e shtetasit italian.
Në reagimin e tij, Salvini theksoi: “Unë kundërshtoj prej kohësh emigrantët e paligjshëm dhe personat që shkelin ligjin, dhe jam i sigurt se edhe Ermal Meta ndan të njëjtin qëndrim. Një përqafim për popullin krenar shqiptar, rroftë Sanremo, gjuha dhe muzika italiane.”
Deklaratat e të dyja palëve u bënë në kuadër të diskutimeve publike rreth gjuhës, integrimit dhe Festivalit të Sanremos.
Lini një Përgjigje