FLASH
Shkruar nga Kamali Melbourne
Nuk e kisha menduar kurrë se do të shihja një president në detyrë të Shteteve të Bashkuara të shpërndante një video që përmban një imazh kaq të hapur dhe të padiskutueshëm racist.
Kur pashë për herë të parë në rrjetet sociale imazhin e Barack dhe Michelle Obama të paraqitur si majmunë, mendova se duhej të ishte i rremë.
E di që presidenti amerikan dhe njerëzit përreth tij kanë thënë dhe kanë bërë më parë gjëra thellësisht raciste. Por kjo? Këtë nuk e besoja dot.
Para se të hynte në politikë, Donald Trump dhe i ati, Fred Trump, u paditën në vitet ’70 nga Departamenti Amerikan i Drejtësisë për refuzimin e dhënies me qira të apartamenteve për qiramarrës me ngjyrë. Në vitet ’80, Trump udhëhoqi thirrjet për dënim me vdekje të pesë të rinjve zezakë, të njohur si “Central Park Five”, të dënuar padrejtësisht për një përdhunim brutal. Edhe pasi u provua pafajësia e tyre, ai vazhdoi të pretendonte se ishin fajtorë.
Ishte po ashtu Trump ai që promovoi teorinë raciste të konspiracionit se Barack Obama nuk ishte president legjitim, duke pretenduar, gabimisht dhe me zë të lartë, se ai nuk kishte lindur në Shtetet e Bashkuara. Kjo u bë e njohur si “birther conspiracy”.
Megjithatë, edhe me gjithë këtë histori, dhe ka edhe shembuj të tjerë, nuk munda ta besoja atë që po shihja kur ai imazh më doli përpara në ekran.
Nuk e kisha menduar kurrë se do të shihja një president në detyrë të Shteteve të Bashkuara të shpërndante një video që përmban një imazh kaq të hapur dhe të padiskutueshëm racist.
Argumenti i disa njerëzve se videoja, po të shihet e plotë, nuk është raciste, është qesharak në naivitetin e tij dhe fyes në supozimin që bën për audiencën që e ka parë.
Autori i videos mori një vendim të qartë për t’i paraqitur Obamat si majmunë. Personi që e shpërndau videon mori po ashtu një vendim të vetëdijshëm për ta publikuar në platformën e tij.
Nuk duhet të ketë nevojë për shpjegim, por dehumanizimi i njerëzve me ngjyrë në këtë mënyrë është një stereotip që daton prej qindra vitesh. Për shumë kohë, ai ishte shtyrë në periferi të historisë, edhe pse mbetej pjesë e gjuhës së supremacistëve të bardhë.
Por diçka ka ndryshuar.
Ndoshta janë rrjetet sociale, ndoshta diçka tjetër, por realiteti ka ndryshuar. Tani jetojmë në një kohë kur, për më shumë se 12 orë, Shtëpia e Bardhë e Trumpit e konsideroi të pranueshme një gjë të tillë.
Ndërsa përgatitesha për ditën, djali im pesëvjeçar vraponte nëpër shtëpi duke luajtur. Sa herë që kalonte pranë ekranit tim dhe ai imazh ishte aty, më duhej ta lëvizja laptopin. Nuk doja që ta shihte. Nuk doja të më duhej ta shpjegoja. Nuk doja ta hapja atë bisedë.
Por do ta kem atë bisedë, ashtu siç e pati nëna ime me mua.
Gjuha dhe sjellja raciste në internet janë shtuar, kanë gjetur audiencë dhe janë përhapur. Është e vështirë të matet saktësisht shkalla e këtij fenomeni, pasi platformat janë të shumta dhe të ndryshme.
Por fakti që ky material u shpërnda dhe u tolerua, tregon se kufijtë janë zhvendosur. /Përshtatur nga "Sky News"
Lini një Përgjigje