FLASH
Shkruar nga Pamfleti
Ngjarja ndodh në Faslane, ku janë të vendosura nëndetëset me armë bërthamore
Autoritetet britanike kanë arrestuar një shtetas iranian dhe një grua pas një përpjekjeje për të hyrë në një bazë detare me rëndësi strategjike në Skoci.
Policia skoceze ndaloi një burrë 34-vjeçar dhe një grua 31-vjeçare në Bazën Detare HM Clyde, rreth orës 17:00 të së enjtes. Sipas të dhënave zyrtare, të dyshuarit tentuan të depërtonin me forcë në ambientet e bazës, por nuk arritën të hynin.
Objekti në Faslane shërben si qendra kryesore e nëndetëseve bërthamore të Marinës Mbretërore, përfshirë edhe mjetet e pajisura me raketa balistike Trident.
Ngjarja vjen në një periudhë tensionesh të larta ndërkombëtare, pas përshkallëzimit të konfliktit që përfshin Iranin dhe aleatët perëndimorë. Në këtë kontekst, autoritetet britanike kanë nisur rishikimin e nivelit të kërcënimit, i cili aktualisht vlerësohet “i konsiderueshëm”.
Qeveria britanike ka ndërmarrë masa shtesë sigurie, duke rritur mbrojtjen për bazat ushtarake dhe personelin në nivel maksimal.
Lini një Përgjigje