FLASH
Shkruar nga Pamfleti
Komiteti i Kongresit amerikan ka publikuar videot e dëshmive të Bill dhe Hillary Clinton në lidhje me çështjen e Jeffrey Epstein. Seancat u zhvilluan javën e kaluar dhe zgjatën dy ditë.
Bill Clinton deklaroi se i kishte ndërprerë marrëdhëniet me Epstein disa vite para se ky i fundit të dënohej në vitin 2008 për prostitucion të një të miture.
Ai pranoi se kishte udhëtuar me avionin privat të Epstein dhe sqaroi se nuk mban mend çdo detaj nga ajo periudhë, duke theksuar se bëhet fjalë për ngjarje të ndodhura më shumë se dy dekada më parë. Sipas tij, ai iu përgjigj pyetjeve mbi bazën e asaj që kujton.
“Unë i bëra ato udhëtime me avionin e tij. Dhe ju keni të drejtë t’i bëni këto pyetje. Kështu që jam e lumtur që jam këtu. Dhe. Do të jem 80 vjeç nëse jetoj deri në ditëlindjen time të ardhshme. Nuk mbaj mend gjithçka që ndodhi 24 vjet më parë, por mbaj mend disa gjëra. Dhe do t’ju tregoj atë që mbaj mend sa më mirë që të mundem”, është shprehur Clinton.
Hillary Clinton dëshmoi për një kohë më të shkurtër. Gjatë marrjes në pyetje, një përfaqësuese demokrate publikoi një foto nga seanca që po zhvillohej me dyer të mbyllura. Veprimi shkaktoi reagim të menjëhershëm nga ish sekretarja e Shtetit dhe avokati i saj, të cilët kërkuan ndërprerjen e seancës.
Hillary Clinton kundërshtoi vijimin e dëshmisë pas publikimit të imazhit dhe paralajmëroi se nuk do të vazhdonte në ato kushte, duke përmendur edhe mundësinë e përballjes me pasoja ligjore.
“Nuk do të vazhdoj me këtë gjë. Nëse ju po bëni diçka të tillë, unë kam mbaruar. Mund të më vendosni përballë përgjegjësisë për shpërfillje të Kongresit. Kjo është thjesht sjellje tipike nga ana juaj”, ka thënë Hillary Clinton.
Përfaqësues të Partisë Demokratike deklaruan se incidenti shkelte rregullat e komitetit për dëshmitë dhe argumentuan se ai tregoi nevojën që seanca të zhvillohej e hapur për publikun, siç kishin kërkuar më herët vetë Bill dhe Hillary Clinton.
Lini një Përgjigje