FLASH
Shkruar nga Pamfleti
Policia e Tiranës ka proceduar penalisht 23 shtetas pas tubimit të zhvilluar mbrëmjen e djeshme para Kryeministrisë, në kuadër të ditës së 18-të të protestës që po zhvillohet në kryeqytet.
Sipas njoftimit zyrtar, krahas masave për garantimin e rendit dhe sigurisë gjatë tubimit, strukturat e Drejtorisë Vendore të Policisë Tiranë kanë kryer veprime hetimore dhe procedurale për identifikimin e personave që dyshohet se kanë shkelur ligjin gjatë protestës.
Nga verifikimet e kryera ka rezultuar se disa pjesëmarrës kanë organizuar dhe drejtuar protestuesit në mënyrë që të bllokonin qarkullimin e lirë të mjeteve në disa akse rrugore të Tiranës, duke devijuar nga itinerari i njoftuar më herët pranë autoriteteve.
Për këtë arsye, specialistët për Hetimin e Krimeve në Komisariatin e Policisë Nr. 3 kanë proceduar penalisht 23 shtetas, të cilët dyshohen për përfshirje në organizimin dhe zhvillimin e këtyre veprimeve.
Policia bën me dije se puna vijon për identifikimin dhe procedimin e personave të tjerë që mund të kenë pasur rol në pengimin e qarkullimit dhe në veprime të tjera të kundërligjshme gjatë tubimit.
Materialet procedurale do t’i referohen Prokurorisë për veprat penale “Organizimi dhe pjesëmarrja në grumbullime e manifestime të paligjshme”, “Prishja e rendit dhe qetësisë publike” dhe “Pengimi i qarkullimit të mjeteve të transportit”.
Po ashtu Policia njofton se shtetasi me inicialet R.M ka kallëzuar për kanosje Gent Prognin, pas një debati lidhur me publikimin e një videoje në një rrjet social, ku pretendohej se Gent Progni pengonte qytetarët të flisnin në podium.
Qytetari që ka kallëzuar Prognin, pretendon se ai dhe bashkëshortja e tij, ndihen të kërcënuar prej Gent Prognit.
Lini një Përgjigje