FLASH
Shkruar nga Pamfleti
Sipas të dhënave, Kaziu ishte nisur drejt Kosovës menjëherë pasi kishte përfunduar shërbimin e natës dhe kishte në vijim dy ditë pushimi.
Është pezulluar nga detyra efektivi i Komisariatit nr. 5 në Tiranë, Aurel Kaziu, pasi u arrestua nga Policia e Kosovës në pikën kufitare të Mendares, pasi u kap duke transportuar rreth 1 milion euro të padeklaruara.
Vendimi për pezullimin është marrë nga Drejtoria e Standardeve Profesionale në Policinë e Shtetit, pas ndalimit të 28-vjeçarit nga autoritetet kosovare.
Sipas të dhënave, Kaziu ishte nisur drejt Kosovës menjëherë pasi kishte përfunduar shërbimin e natës dhe kishte në vijim dy ditë pushimi. Ai dyshohet se nuk kishte njoftuar eprorët për daljen jashtë territorit të Shqipërisë.
Efektivi prej rreth tre vitesh ishte pjesë e Policisë së Shtetit. Më herët, ai është marrë me transport mallrash nga Shqipëria drejt vendeve të Evropës dhe Mbretërisë së Bashkuar.
Gjatë kontrollit, autoritetet kosovare sekuestruan shumën prej 1 milion eurosh. Dyshohet se paratë mund t’i përkasin personave të tjerë dhe të kenë burim nga veprimtari të paligjshme. Sipas informacioneve paraprake, Kaziu dhe dy persona të tjerë po e transportonin shumën në mënyrë të jashtëligjshme.
Autoritetet shqiptare pritet të kërkojnë informacion zyrtar nga homologët në Kosovë për të sqaruar plotësisht rrethanat e rastit dhe nivelin e përfshirjes së efektivit të pezulluar.
Lini një Përgjigje