FLASH
Shkruar nga Pamfleti
Të tjera detaje janë zbardhur nga ekzekutimi i 57-vjeçarit Pjetër Kaza, i cili u qëllua me breshëri plumbash, në oborrin e banesës së tij, të dielën e 1 qershorit.
Në emisionin “Në Shënjestër”, gazetarja Klodiana Lala, bëri të ditur se Kaza sapo kishte lënë punën e tij në minierë dhe si çdo mbrëmje po kthehej në banesën e tij në Tale të Lezhës aty ku jetonte me familjen.
Ishte ora 01:00 e mëngjesit e datës 1 Qershor kur ai ndërsa po bëhej gati të hapte portën e madhe të banesës së tij, teksa e ndanin vetëm pak hapa nga hyrja në shtëpi, nga një armë zjarri u derdhën 12 plumba drejt trupit të tij, që i morën jetën pa i dhënë asnjë mundësi shpëtimi duke e shpuar tej e përtej.
Mendohet se autori apo autorët kanë përdorur një armë zjarri me silenciator, për të mos u dëgjuar krismat pasi plumbat nuk u dëgjuan nga askush, as nga vetë familjarët e tij të cilët duhet të prisnin mëngjesin, për të kuptuar se i afërmi i tyre kishte humbur jetën tragjikisht në derën e banesës, ndërsa ata e prisnin si zakonisht të kthehej në banesë.
Policia grumbulloi në vendngjarje të paktën 12 gëzhoja plumbash dhe mori dëshmitë e para për krimin.
E para që iu përgjigj hetuesve ishte bashkëshortja e viktimës, e cila konfirmoi se e gjeti të shoqin të vrarë në orën 05:00 të mëngjesit, edhe pse nuk kishte dëgjuar asnjë krismë, që t’i tërhiqte vëmendjen.
“Bashkëshortja e viktimës deklaron se e gjeti të vrarë bashkëshortin në orët e para të mëngjesit, dhe makina ishte ende e ndezur. Ajo tha se bashkëshorti nuk ruhej për shkak se kishte humbur 2 vëllezër për motive gjakmarrje dhe i treti ndodhej në burg”, thuhet në dëshminë e bashkëshortes së Pjetër Kazës para grupit hetimor.
Vrasja e Pjetër Kazës riktheu edhe njëherë hijet e frikshme të një gjakmarrje mes fiseve Kaza dhe Gjini mbi 30-vjeçare, që deri më sot ka prodhuar 5 viktima.
Përplasja e fisit Kaza me atë Gjini e ka gjenezën në vitin e largët 1994. Plot 31 vite më parë, koha kur nisi edhe një gjakmarrje që duket se vazhdon edhe sot.
Lini një Përgjigje