FLASH
Shkruar nga Pamfleti
Detaje të reja dhe tronditëse kanë dalë në dritë lidhur me dosjen e Jeffrey Epstein, këtë herë të fokusuara në pronën e tij në New Mexico, e njohur si “Zorro Ranch”.
Sipas raportimeve të përfshira në dokumentarin e emisionit “60 Minutes” në Australi, si dhe mediave ndërkombëtare si The Sun, prona është përshkruar si një zonë e izoluar ku dyshohet se janë kryer abuzime të rënda seksuale për një periudhë të gjatë kohe.
Dëshmitë e të mbijetuarve hedhin dritë mbi një mjedis të mbyllur dhe të kontrolluar, ku viktimat pretendojnë se mbaheshin të izoluara dhe nën presion psikologjik. Një prej tyre, Soday Davis, e ka përshkruar fermën si vendin më të frikshëm që ka përjetuar ndonjëherë, duke thënë se shpesh qëndronte e mbyllur për orë të tëra pa mundësi ndihme nga jashtë.
Sipas dëshmive të publikuara, izolimi i pronës e bënte thuajse të pamundur çdo thirrje për ndihmë, ndërsa viktimat pretendojnë se detyroheshin të takonin Epstein nën pretekste të ndryshme.
Në të njëjtën kohë, raportimet flasin edhe për akuza të reja që përfshijnë jo vetëm gra, por edhe burra, të cilët dyshohet se janë trafikuar dhe detyruar të marrin pjesë në situata abuzive. Një dëshmi e përmendur nga një ish-zyrtar amerikan flet për raste të drogave dhe abuzimeve në grup ndaj të rinjve.
Zbulime edhe më të rënda lidhen me pretendime të paraqitura në një ankesë të FBI-së në vitin 2019, ku përmenden dy vdekje të dyshuara në pronë, në rrethana të paqarta dhe të dhunshme. Sipas këtyre pretendimeve, autoritetet nuk e çuan hetimin në një fazë të plotë në atë kohë.
Rasti është rikthyer sërish në vëmendjen e publikut, pasi autoritetet në New Mexico kanë hapur një hetim të ri, ku një komitet i posaçëm po shqyrton dëshmi, dokumente dhe prova të reja. Dhjetëra persona kanë dhënë dëshmi për përvoja të ndryshme të abuzimit, duke e zgjeruar edhe më tej dimensionin e akuzave rreth një prej çështjeve më të errëta penale në SHBA.
Lini një Përgjigje