FLASH
Shkruar nga Pamfleti
Çmimi i naftës në tregjet ndërkombëtare ka vijuar rritjen, duke kaluar nivelin e 110 dollarëve për fuçi të martën, në një kohë kur negociatat mes SHBA dhe Iranit për një marrëveshje paqeje mbeten të bllokuara.
Nga ana tjetër, Irani thuhet se ka paraqitur një propozim për heqjen e bllokadës në Ngushticën e Hormuzit, por deri tani nuk ka pasur reagim të detajuar publik nga Shtëpia e Bardhë lidhur me këtë ofertë.
Nafta bruto Brent ka shënuar një rritje mbi 2%, duke shtuar pritshmëritë në tregje se bankat qendrore mund të ndërhyjnë me rritje të normave të interesit për të frenuar presionet inflacioniste.
Kjo është hera e parë që çmimi i Brent kalon mbi 110 dollarë që prej datës 7 prill, kur një njoftim për armëpushim të përkohshëm nga presidenti amerikan Donald Trump ndikoi në uljen e tij.
Situata në Ngushticën e Hormuzit ka ndikuar ndjeshëm në tregtinë detare gjatë dy muajve të fundit, duke kufizuar lëvizjen e anijeve dhe duke prekur furnizimet globale me naftë dhe gaz.
Të dhënat e monitorimit tregojnë se vetëm tetë anije kanë kaluar në këtë korridor detar të dielën, ndërkohë që më herët qarkullimi ditor arrinte mesatarisht në 129 anije, sipas statistikave të OKB për tregtinë dhe zhvillimin.
Sulmet ndaj infrastrukturës energjetike kanë ndikuar në uljen e prodhimit global, ndërsa ekspertët vlerësojnë se rikthimi në nivele normale do të kërkojë kohë, edhe në rast se palët arrijnë një marrëveshje për t’i dhënë fund konfliktit.
Lini një Përgjigje