FLASH
Shkruar nga Pamfleti
Hetuesit zbulojnë një rrjet të gjerë ryshfetesh në energji dhe mbrojtje, në qendër, ish-bashkëpunëtorë dhe miq të presidentit ukrainas.
Një nga hetimet më të mëdha kundër korrupsionit në Ukrainë prej fillimit të luftës ka tronditur strukturat e pushtetit në Kiev, duke përfshirë emra që lidhen drejtpërdrejt me rrethin e ngushtë të presidentit Volodymyr Zelensky.
Hetuesit e Byrosë Kombëtare Kundër Korrupsionit (NABU) dhe Prokurorisë Speciale Kundër Korrupsionit (SAPO) kanë zhvilluar mbi 70 kontrolle në kuadër të operacionit të koduar “Midas”, pas një hetimi që ka zgjatur më shumë se 15 muaj. Sipas burimeve të afërta me hetimin, rrjeti i zbuluar përfshin zyrtarë të lartë në sektorët e energjisë dhe mbrojtjes, të cilët akuzohen për pastrim parash, shpërdorim fondesh shtetërore dhe pasurim të paligjshëm.
Në qendër të hetimeve ndodhen ministri aktual i Drejtësisë, Herman Halushchenko, i cili më parë ka drejtuar Ministrinë e Energjisë, si dhe biznesmeni Timur Mindich, bashkëpronar i studios së famshme Kvartal 95, kompania që solli në skenë vetë Zelenskyn përpara se ai të hynte në politikë.
Kontrollet në banesën e Halushchenkos dhe në zyrat e kompanisë shtetërore Energoatom, që administron termocentralet bërthamore të Ukrainës, kanë sjellë konfiskimin e dokumenteve dhe pajisjeve elektronike që lidhen me tenderët e mëdhenj në fushën e energjisë. Ndërkohë, Mindich dyshohet se ka braktisur Ukrainën disa javë më parë dhe aktualisht mund të ndodhet në Austri.
Hetimi përqendrohet në një skemë ryshfeti të gjerë, ku kompanitë private të kontraktuara për furnizime energjetike dhe mbrojtëse thuhet se paguanin deri në 15% të vlerës së kontratës për të fituar tenderët publikë. Ky sistem i gjerë korrupsioni, i ndërtuar përmes rrjeteve të ndërmjetësve dhe ish-zyrtarëve të Energoatom-it, dyshohet se funksiononte prej vitesh dhe kishte lidhje të drejtpërdrejta me figura politike të nivelit të lartë.
Për Zelenskyn, i cili e ka ndërtuar reputacionin e tij ndërkombëtar mbi betejën kundër korrupsionit, kjo është një goditje e fortë politike. Hetimi përfshin jo vetëm figura të qeverisë aktuale, por edhe ish-bashkëpunëtorë të tij të hershëm nga periudha kur ai drejtonte industrinë e humorit dhe televizionit. Lidhjet e Mindich me oligarkun e njohur Ihor Kolomoisky, i cili po ashtu është nën hetim për mashtrim financiar, shtojnë dyshimet se një pjesë e rrjetit ekonomik që financoi ngritjen e Zelenskyt në pushtet po përfshihet tani në skandale me fondet shtetërore.
Në Kiev, komentatorët flasin për “valën e dytë të korrupsionit” që godet pastrimin institucional të vendit. Edhe pse zyrtarisht presidenti ka urdhëruar “bashkëpunim të plotë me drejtësinë”, opozita ka kërkuar hetim parlamentar për të përcaktuar nëse struktura të afërta me presidencën kanë ndërhyrë në tenderët e sektorit të energjisë gjatë viteve 2022–2024.
Në këtë klimë tensioni, Operacioni “Midas” po shihet si një provë e madhe për imazhin e Ukrainës në arenën ndërkombëtare, sidomos në momentin kur vendi kërkon fonde të reja nga Bashkimi Evropian dhe SHBA. Për shumë vëzhgues perëndimorë, korrupsioni mbetet “arma më e rrezikshme” që po e minon nga brenda vetë projektin reformues të Zelenskyt. /Pamfleti
Korrupsioni i sllaveve ka qene, eshte e do te jete i pamatshem. Mbajini larga nga trojet se te bejne baterdine.