FLASH
Shkruar nga Pamfleti
Hungaria po përballet me një valë mesazhesh dhe materialesh manipuluese në prag të zgjedhjeve parlamentare. Në Budapest dhe në zonat përreth janë shfaqur billborde, video dhe përmbajtje në rrjete sociale që paraqesin liderin e opozitës Péter Magyar si të varur nga Brukseli dhe si politikan që do ta çonte vendin drejt përfshirjes në luftë.
Sipas raportimeve të mediave ndërkombëtare, kjo fushatë dyshohet se lidhet me një operacion dezinformimi të mbështetur nga Moska, me qëllim favorizimin e kryeministrit Viktor Orbán në zgjedhjet e ardhshme.
Në qendër të organizimit të kësaj strategjie përmendet Social Design Agency, një kompani konsulence mediatike që nga viti 2024 është lidhur me Kremlinin dhe është vendosur nën sanksione nga vendet perëndimore. Kompania është përfshirë edhe në operacionin e njohur si “Doppelganger”, i cili kishte për qëllim përhapjen e lajmeve të rreme dhe nxitjen e qëndrimeve kundër Ukrainës pas nisjes së pushtimit rus.
Fushata aktuale në Hungari ndjek një qasje tjetër. Përmbajtja prodhohet në Rusi, por shpërndahet nga figura publike dhe influencerë hungarezë në mënyrë që të duket si iniciativë vendase.
Sipas një plani të brendshëm të kësaj kompanie, janë identifikuar rreth 50 personalitete që mbështesin Orbán dhe 30 figura të opozitës për shpërndarjen e materialeve të ndryshme në rrjet. Mesazhet paraqesin kryeministrin si një lider të fortë me lidhje ndërkombëtare, përfshirë edhe Donald Trump, dhe si politikanin e vetëm që mund të mbrojë sovranitetin e Hungarisë dhe të negociojë me liderët botërorë.
Në të njëjtën kohë, Péter Magyar paraqitet si drejtues i një opozite të përçarë dhe të paaftë për të qeverisur. Materialet përfshijnë edhe sulme ndaj liderëve të Bashkimit Evropian dhe Ukrainës, të cilët akuzohen për shpërdorim të fondeve publike. Në një nga billbordet, ata paraqiten duke hedhur para në një tualet të artë. Ndërkohë, video të krijuara me inteligjencë artificiale shfaqin ushtarë hungarezë të vrarë në frontin ukrainas.
Magyar ka reaguar publikisht duke akuzuar qeverinë dhe shërbimet ruse të inteligjencës për përgatitjen e një fushate tjetër shpifëse të ngjashme me atë të përdorur më parë në Moldavi. Ai deklaroi se janë përgatitur 14 video të gjeneruara me inteligjencë artificiale që synojnë një kandidat të partisë Tisza dhe familjen e tij. Sipas tij, këto materiale pritet të shpërndahen përmes llogarive të rreme në rrjete sociale për një audiencë prej dhjetëra milionë përdoruesish.
Ndërkohë, raportime të fundit tregojnë se tre oficerë të inteligjencës ushtarake ruse GRU kanë mbërritur në Budapest dhe janë vendosur në ambasadën ruse. Burime të ndryshme thonë se ata mund të jenë të lidhur me Sergei Kirienko, një nga figurat kryesore në administratën e Vladimir Putin, i cili më parë ka drejtuar operacione të ngjashme të dezinformimit në vende të tjera.
Magyar kërkoi reagim nga qeveria dhe largimin e menjëhershëm të tyre nga Hungaria, duke bërë thirrje që agjentët rusë të dëbohen nga vendi. Ai përdori edhe një referencë historike ndaj revoltës anti-sovjetike të vitit 1956, duke u bërë thirrje rusëve të largohen nga Hungaria.
Lini një Përgjigje