Shkruar nga Pamfleti
Ministri e kuptoi sot se ndonjëherë është më e zgjuar të heshtësh. Deklarata dhe pranimi i Milan Radoiçiçit se ai është përgjegjës për konfliktin e armatosur në Banjskë bie plotësisht në kundërshtim me pretendimin e Daçiç...
Milan Radoiçiç, tashmë ish-nënkryetar i Listës Serbe, mori përgjegjësinë për konfliktin e armatosur në Banjskë, ku u vranë tre serbë dhe një polic shqiptar.
Ai në këtë mënyrë ka konfirmuar dyshimet që qarkullonin me ditë të tëra, sidomos pasi u shfaq videoja në të cilën sipas policisë së Kosovës ishte Radoiçiç. Dhe ndërsa të gjithë po pyesnin se si nënkryetari i LS erdhi në Banjskë me pajisje të plota ushtarake, një zyrtar i qeverisë vendosi se ishte më mirë të gënjejë hapur qytetarët e Serbisë duke pretenduar se "videoja është një mashtrim". E kemi fjalën për ministrin e Jashtëm, Ivica Daçiç.
Ministri e kuptoi sot se ndonjëherë është më e zgjuar të heshtësh. Deklarata dhe pranimi i Milan Radoiçiçit se ai është përgjegjës për konfliktin e armatosur në Banjska bie plotësisht në kundërshtim me pretendimin e Daçiç të dy ditëve më parë kur tha se gjithçka ishte një mashtrim.
“Këtu po përpiqen të dëshmojnë dhe të tregojnë se ka qenë Milan Radoiçiç apo Zvonko Veselinoviç që i kanë kryer këto veprime. Ata më së shumti do të donin të kishin hasur Mojsiloviçin sepse kanë nevojë për një lidhje me Beogradin. Duan të thonë se dikush po e importon nga jashtë. Nga njëra anë thonë se Vuçiç është organizator, e në anën tjetër ne hoqëm dorë dhe gjithçka e bartëm në Kosovë”, tha Daçiç, duke shtuar: “Ka pasur edhe borë, që do të thotë se nuk është regjistrim nga ajo ditë”.
Meqë ra fjala, në video nuk ka borë. Gjurmët e bojës së bardhë janë në fakt ngjyra e gurit dhe këtë e dinin të gjithë ata që u ulën në studion e RTS, përfshirë edhe gazetarin, por për askënd nuk kishte rëndësi. As fakti që në kuadrin e plotë të videos me dron shihet gjelbërimi i plotë i shtatorit.
Në fund Milan Radoiçiç ka pranuar se ditën në fjalë ka qenë në Banjska. Madje, ai ka deklaruar se ka organizuar gjithçka.
“Unë, Milan Radojiçiç, djali i Rajko, i lindur në Republikën e Serbisë, për shkak të spekulimeve të shumta që janë shfaqur, njoftoj opinionin se së bashku me bashkatdhetarët e mi nga veriu i Kosovës dhe Metohisë, më 24 shtator kam ardhur në veri të Kosovës dhe Metohisë, në fshatin Banjskë. Arsyeja e kthimit tonë ishte inkurajimi i popullit serb nga ajo zonë që t'i rezistojë terrorit të cilit i ekspozohet përditë. I njoftoj të gjithë të përndjekurit në detyrë të popullit serb, që nga Kurti e deri te ndihmësit e shumtë të huaj, se personalisht i kam bërë të gjitha përgatitjet logjistike për mbrojtjen e popullit dhe ky akt nuk ka të bëjë fare me përfshirjen time të mëparshme politike. Për këtë nuk kam njoftuar askënd, madje as qeverinë e Republikës së Serbisë, e as nuk kam marrë ndonjë ndihmë prej tyre sepse tashmë kemi pasur qëndrime të ndryshme për çështjen e terrorit të Kurtit”, ka thënë Milan Radoiçiç.
A do të mjaftojë e gjitha kjo që ministri Daçiç t'u kërkojë falje qytetarëve të Serbisë të cilët i ka gënjyer në transmetim të drejtpërdrejtë - nuk ka gjasa, por nuk është as e rëndësishme. Një pyetje shumë më e rëndësishme është se për çfarë tjetër na gënjeu ministri në të kaluarën kur ai mund ta bënte atë për diçka që është aq e dukshme. /Nova.rs
