FLASH
Shkruar nga Pamfleti
Policia e Fierit ka zbuluar një ambient të përshtatur për tharjen dhe përpunimin e lëndës narkotike në zonën e Rezervuarit të Divjakës, ku u sekuestruan 44 kilogramë lëndë e dyshuar kanabis.
Operacioni i koduar "Koordinimi", i zhvilluar pas kontrolleve nga toka dhe ajri me dronë, çoi në zbulimin e 37 kilogramëve kanabis në proces tharjeje dhe 7 kilogramëve kanabis në formë boçesh. Lënda narkotike u sekuestrua si provë materiale.
Në vijim të hetimeve, Prokuroria e Fierit nisi procedim penal në gjendje të lirë për veprën penale "Shpërdorimi i detyrës" ndaj tre punonjësve të Administratës Rajonale të Zonave të Mbrojtura në qarkun Fier: Edison Toromëni, me detyrë përgjegjës sektori, Festim Hoxha, specialist menaxhimi, dhe Gazmor Allka, me detyrë roje.
Sipas Policisë, hetimet vijojnë për identifikimin dhe kapjen e autorit ose autorëve të kultivimit të bimëve narkotike, ndërsa kontrollet në territor do të vazhdojnë për goditjen e kësaj veprimtarie kriminale.
"Si rezultat i kontrolleve intensive në territorin e qarkut Fier, nga toka dhe nga ajri, me dronë, shërbimet e Drejtorisë Vendore të Policisë Fier, në bashkëpunim me shërbimet e Komisariatit të Policisë Divjakë, bazuar dhe në informacionet e siguruara në rrugë operative, kanë finalizuar operacionin e koduar "Koordinimi".
Gjatë operacionit, në vendin e quajtur “Rezervuari i Divjakës”, në një tokë shtetërore, u gjet një ambient i përshtatur për tharjen dhe përpunimin e bimëve narkotike. Në këtë ambient u gjetën 37 kilogramë lëndë e dyshuar narkotike kanabis në proces tharjeje dhe 7 kilogramë lëndë e dyshuar narkotike kanabis në formë boçesh. Lënda narkotike u sekuestrua në cilësinë e provës materiale, me qëllim kryerjen e ekspertimit.
Në vijim të veprimeve procedurale, specialistët e Sektorit për Hetimin e Narkotikëve në DVP Fier referuan materialet në Prokurori ku nisi procedimi në gjendje të lirë për veprën penale “Shpërdorimi i detyrës”, për 3 punonjës të Administratës Rajonale të Zonave të Mbrojtura në qarkun Fier, shtetasit:
-E. T., 33 vjeç, me detyrë përgjegjës sektori, F. H., 37 vjeç, me detyrë specialist menaxhimi dhe G. A., 53 vjeç, me detyrë roje.
Vijon puna, në drejtimin e Prokurorisë së Fierit, për identifikimim dhe kapjen e autorit/ëve të kultivimit të bimëve narkotike.
Drejtoria Vendore e Policisë Fier vijon kontrollet intensive nga ajri, me dronë, dhe nga toka, me qëllim parandalimin dhe goditjen e veprimtarisë kriminale të kultivimit të bimëve narkotike", njoftoi policia.
Lini një Përgjigje