FLASH
Shkruar nga PamfletiNë këtë Edicion Informativ ju ftojmë të ndiqni zhvillimet kryesore deri në këtë orë të ditës:
Opozita në Shqipëri ka nisur protestën e saj, duke mbushur sheshet e kryeqytetit, ndërsa Policia ka blinduar zonën e Kryeministrisë dhe është gati të përdorë gazin lotësjellës dhe ujin për shpërndarje në rast të episodeve të dhunshme. Paralelisht, Bashkimi Europian u ka bërë thirrje institucioneve të ndalojnë sulmet ndaj SPAK, ndërsa Bylykbashi denoncon në OSBE se korrupsioni po kap drejtësinë dhe rrezikon demokracinë.
Në skenën e drejtësisë, Apeli i GJKKO rrëzoi kërkesën e ish-deputetit të PS-së, Jurgis Çyrbja, duke e lënë në burg për akuza që përfshijnë “korrupsion zgjedhor”, “përkrahje të autorit të krimit” dhe “tregtim të sekretit shtetëror”. Ndërkohë, policia zhvilloi një operacion në Fushë-Krujë, duke sekuestruar arsenal armësh dhe municioni, ndërsa 49-vjeçari Ylli Zalla është shpallur në kërkim.
Tiranë dhe zona përreth shënuan edhe ngjarje të tjera tragjike: Egli Pashollari, 32 vjeç, u vra me thikë në rrugën “Kongresi i Lushnjës”, ndërsa një 34-vjeçar mbeti i plagosur nga një konflikt tjetër në Rrugën e Kavajës. Në veri të kryeqytetit, banorët e Gramzës bllokuan rrugën Thumanë-Kashar, duke kërkuar asfaltim të segmentit problematik.
Në Kosovë, Kuvendi miratoi buxhetin e vitit 2026 me 62 vota për, 32 kundër dhe asnjë abstenim, duke shpërndarë rreth 4 miliardë euro për paga, shërbime, subvencione dhe shpenzime kapitale.
Në politikën ndërkombëtare, takimi i Bordit të Paqes në Uashington mes Donald Trump, Vjosa Osmanit dhe Edi Ramës shkaktoi reagime në Serbi, ku mediat ironizuan deklaratat e Trump për rolin e tij në ndalimin e konflikteve. Ndërkohë, bisedimet për paqen Rusi-Ukrainë duket se janë në ngërç, me Zelenskyn që ka kërkuar plan për tre vjet të tjera luftë.
Në Britani, ish-princi Andrew u lirua pas 12 orësh pyetjesh lidhur me skandalin Jeffrey Epstein, ndërsa SHBA ka vendosur dy aeroplanmbajtëse pranë Iranit, duke dhënë ultimatum 10-ditor për marrëveshje bërthamore, me rrezik për një konflikt global.
Lini një Përgjigje