FLASH
Shkruar nga Pamfleti
Shqipëria U-15 triumfoi me rezultatin 3-2 ndaj Maltës, takimi i dytë miqësor i luajtur brenda dy ditëve në “Shtëpinë e Futbollit”. Për kuqezinjtë e drejtuar nga trajneri Gent Mahmuti shënuan Kevin Plepi, Samuel Plepi dhe kapiteni Denion Avdylaj.
Trajneri Mahmuti e nisi ndeshjen me këtë formacion: Lionel Ademi (GK), Denian Avdylaj (C), Kevin Muharremi, Romeo Hazizaj, Kevin Plepi, Enea Taci, Deni Duka, Gean Ramadani, Satjago Perkola, Samuel Prendi, Noel Lleshi.
Kuqezinjtë e nisën shumë mirë ndeshjen, duke kaluar të parët në epërsi që në minutën e 5 të takimit. Kevin Plepi realizoi për Shqipërinë, duke përfituar nga rrëmuja në zonën kundërshtare.
Samuel Prendi dyfishoi shifrat për ekipin tonë në minutën e 15. Duka dhuroi një asist për sulmuesin, i cili u fut brenda në zonë dhe e çoi topin në fundin e rrjetës.
Pjesa e parë u mbyll me rezultatin 2-0 për Shqipërinë. Në fraksionin e dytë, miqtë ngushtuan rezultatin në minutën e 63. Ky gol nuk i demoralizoi kuqezinjtë, të cilët gjetën golin e tretë në minutën e 80 me Denion Avdylaj. I gjendur brenda zonës, kapiteni provon të gjuajë topin drejt e në portë, por pengohet fillimisht nga rreshtimi i kundërshtarëve. Topi mbetet sërish në zonë dhe Avdylaj tenton sërish duke e çuar këtë herë topin në portë.
Maltezët ngushtojnë sërish shifrat në minutën e 86, një gol që nuk ndryshoi aspak fatin e takimit pasi ndeshja u mbyll me rezultatin 3-2 për Shqipërinë U-15.
Fitorja në këtë sfidë i takoi kuqezinjve të vegjël, të cilët pas humbjes 2-1 në ndeshjen e parë, reaguan pozitivisht në takimin e dytë miqësor kundër Maltës.
Lini një Përgjigje