FLASH
Shkruar nga Pamfleti
Vendet aziatike duket se po përballen me ndikimin më të madh nga ndërprerjet në furnizimin me naftë dhe gaz, veçanërisht ato që mbështeten në importet e energjisë nga Lindja e Mesme dhe që kanë rezerva strategjike të kufizuara.
Miyu Su, analiste e lartë për naftën bruto në kompaninë e të dhënave dhe analizave të tregut të energjisë Kpler, deklaroi për Al Jazeera se humbësit më të mëdhenj nga kriza janë “të gjitha vendet aziatike, veçanërisht ato që varen shumë nga Lindja e Mesme, por kanë rezerva relativisht të ulëta, si vendet e Azisë Juglindore, për shembull Tajlanda dhe Vietnami”.
Ajo shpjegoi se disa shtete po shqyrtojnë përdorimin e rezervave të tyre strategjike për të zbutur pasojat e ndërprerjeve në tregun e energjisë.
Nuk do të jetë e mjaftueshme nëse lufta zgjat më shumë se një muaj
Megjithatë, sipas analistes, këto masa mund të kenë efekt të kufizuar. Ajo tha se Koreja e Jugut dhe Japonia po planifikojnë të lirojnë një pjesë të rezervave të tyre të naftës, por paralajmëroi se kjo nuk do të jetë e mjaftueshme në rast të një konflikti të zgjatur.
“Nuk do të jetë e mjaftueshme nëse lufta zgjat më shumë se një muaj”, theksoi ajo.
Situata është e ngjashme edhe për Kinën, pavarësisht faktit se vendi disponon rezerva të konsiderueshme. Sipas analistes, Pekini mban rreth 1.3 miliardë fuçi naftë të papërpunuar në depozita në tokë.
Megjithatë, edhe me këto rezerva, vendi do të duhet të gjejë burime alternative për të mbushur menjëherë çdo boshllëk të mundshëm në furnizim.
“Edhe për Kinën, e cila aktualisht ka 1.3 miliardë fuçi rezerva nafte bruto në tokë – nevojitet një zgjidhje për të mbushur menjëherë boshllëkun, dhe për momentin nuk ka një kandidat që mund ta bëjë këtë”, theksoi Su.
Lini një Përgjigje