FLASH
Shkruar nga Pamfleti
PSG-ja, Bajerni i Mynihut, Arsenali dhe Atletiko e Madridit kanë siguruar kualifikimin në gjysmëfinalet e Champions League, pas një sezoni të mbushur me ndeshje intensive dhe rezultate surprizë. Me fazën vendimtare tashmë në zhvillim, vëmendja është zhvendosur te pretendentët për trofeun dhe probabilitetet që ofron analiza statistikore.
Bajerni i Mynihut dhe PSG-ja kanë shfaqur formë të qendrueshme gjatë turneut. Skuadra gjermane eliminoi Atalantën në 1/8-at dhe më pas Realin e Madridit në çerekfinale, në një përballje të fortë. Ndërkohë, PSG-ja kaloi relativisht lehtë dy ekipet angleze, Çelsi dhe Liverpul, duke konfirmuar vazhdimësinë e rezultateve të sezonit të kaluar.
Në çiftin tjetër gjysmëfinalist, Atletiko e Madridit përballet me Arsenalin. Edhe pse tradicionalisht të konsideruara si skuadra më pragmatike, statistikat tregojnë një efikasitet të lartë ofensiv për Atletikon, që ka realizuar 34 gola në këtë edicion, 4 më pak se Bajerni dhe PSG (nga 38 secili).
Arsenali dhe Atletiko e Madridit mbajnë një rekord të veçantë: janë dy skuadrat me më shumë ndeshje në historinë e Champions League pa e fituar trofeun. Arsenali numëron 223 ndeshje, ndërsa Atletiko 190. Kualifikimi i njërit prej tyre në finale garanton mundësinë për t’i dhënë fund kësaj pritjeje të gjatë.
Parashikimet e Opta-s
Sipas simulimeve të superkompjuterit “Opta”, Bajerni i Mynihut konsiderohet favorit për të fituar trofeun, me 36.6% probabilitet. Shumë pranë ndodhet Arsenali me 35.7%, duke e bërë garën të hapur.
Arsenali ka gjasat më të larta për të arritur në finale (71.7%), pjesërisht për shkak të përballjes me Atletikon, që sipas renditjes së “Opta”-s është skuadra më pak e favorizuar nga katër finalistët.
Nga ana tjetër, Bajerni përballet me një sfidë më të vështirë ndaj PSG-së, kampionin në fuqi. Megjithatë, gjermanët kanë 61.7% mundësi për të kaluar në finale. PSG ka vetëm 19% shanse për të mbrojtur titullin sipas këtyre simulimeve.
Atletiko e Madridit rezulton me probabilitetin më të ulët për fitimin e trofeut, vetëm 8.8%, megjithëse performanca e tyre në fazat e mëparshme lë hapësirë për surpriza.
Lini një Përgjigje